Նոյեմբերի 8-ին Զորավոր Ս. Աստվածածին եկեղեցու բակում «Արև-երեխաներ» ՀԿ-ի կենտրոնի հեռավար դասընթացներին մասնակից միջին և ավագ տարիքային խմբերի սաները հանդես եկան բաց դասով, որ կազմակերպել էր հատուկ հոգեբան, մանկավարժ, վարքային թերապիստ Աննա Գևորգյանը: Բաց դասը աշնան վերաբերյալ էր, որն ավելի տպավորիչ էր դարձել եկեղեցու բակի աշնանային այգու գողտրիկ անկյունում: Աշնան գեղեցկությունն ու ոսկեգույն հեքիաթը արևները ներկայացրին փոքրիկ բանաստեղծություններով և գույնզգույն տերևներով պատրաստած ապլիկացիաներով: Արևները հայտնվել էին յուրահատուկ աշնանային աշխարհում՝ իրենց շուրջը տարածելով աշնան ոսկեգույն խաղաղությունը և ուրախությունը:
Նշենք, որ մինչ բաց դասը հատուկ մանկավարժը հեռավար դասընթացներին միջին և ավագ տարիքային խմբերի սաներին ծանոթացրել էր աշնան հիմնական առանձնահատկություններին՝ եղանակային փոփոխություններին, բերքահավաքին, տերևաթափին՝ երեխաների մոտ դաստիարակելով բնության հանդեպ սեր և հոգատար վերաբերմունք:
Բաց դասը եզրափակեց «Արև-երեխաներ» ՀԿ-ի «Արևային զանգակներ» համույթը (գեղարվեստական ղեկավար՝ Մանուշ Դանիելյան)՝ իր գունեղ և ոգևորիչ կատարումներով ուրախություն պատճառելով ներկաներին:
Աշնան բազմերանգությունը ներկայացնող բաց դասը նպատակ ուներ երեխաների մեջ խորացնելու աշնան մասին գիտելիքները, խթանելու բնության նկատմամբ պատասխանատու վերաբերմունք և զարգացնելու խոսքային ակտիվությունը, բառապաշարը, դիտողական ու նկարագրական կարողությունները:
Կարինե Սուգիկյան
Մեկնաբանությունները անջատված են։