Աստծո պատկերն ու նմանությունն ունեցող անձը կյանքի է կոչում Սուրբ Հոգու պտուղները, որոնք են՝ սեր, ուրախություն, խաղաղություն, համբերատարություն, ազնվություն, բարություն, հավատարմություն, հեզություն, ժուժկալություն (Գաղ. 5:22): Աստծո Որդին՝ Հիսուս Քրիստոս, աշխարհ եկավ, մարդացավ, որպեսզի մարդն աստվածանա (Ս. Աթանաս Ալեքսանդրացի) և աստվածային սիրո արտացոլանքը դառնա: Ամեն բարիք, որ ունի մարդ իր սրտում, աստվածային պարգև է, ինչի շնորհիվ կառուցում է իր հոգևոր կյանքը և քայլ առ քայլ դեպի Աստված ընթանում: Առաքինի անձը, երկրի վրա բարին հաստատելով, ժամանակին կքաղի Սուրբ Հոգու պտուղները, եթե իր ընթացքի մեջ չտկարանա. «Գալով մեզ՝ չձանձրանանք բարիք գործելուց, որովհետև եթե հարատևենք, արդյունքն անպայման կքաղենք իր ժամանակին» (Գաղ 6:9): Սուրբ Հոգու պտուղների ձեռքբերումով մարդու առջև բացվում են հավիտենության դարպասները, քանի որ Երկնային Արքայությունն սկիզբ է առնում երկրից՝ մարդու սրտից:

Եկեղեցու հայրերն ուսուցանում են, որ բարիք է նաև միմյանց համար աղոթելը, ուշադրություն և հոգածություն ցուցաբերելը՝ չմոռանալով ննջեցյալների հոգու հանգստության համար արված աղոթքներն ու բարի գործերը: Հունիսի 5-ին Զորավոր Ս. Աստվածածին եկեղեցում հոգևոր հովիվ Տեր Գրիգոր քահանա Գրիգորյանը, Զորավոր Ս. Աստվածածին եկեղեցու և «Արև-երեխաներ» ՀԿ-ի սոցիալական ծրագրերի շրջանակում, Դիանա Վարդանյանին (42 տ.) փոխանցեց դրամական աջակցություն (50 000 դրամ), որ տրամադրել էր Զորավոր Ս. Աստվածածին եկեղեցու համայնքի անդամներից մեկը՝ ի հիշատակ իր վաղամեռիկ եղբոր: Դիանան իր ամուսնու, երկվորյակ զավակների, սկեսրայրի և սկեսուրի հետ բնակվում է Արցախի 8/4 շ. բն. 6 հասցեում: Երկվորյակ զավակներից Միքայելը (5 տ.) Դաունի համախտանիշ ունի: Դիանան իր երախտագիտությունը հայտնեց Տեր Գրիգորին և աջակից անձին:

Կարինե Սուգիկյան