«Հայր Աստծո համար անկեղծ և իսկական բարեպաշտությունը կարոտության մեջ եղող որբերին և այրիներին այցելելն ու նրանց օգնելն է և աշխարհի մեջ ապրելով հանդերձ՝ ինքն իրեն անարատ պահելը» (Հակոբ. 1:27): Քրիստոնեական կրոնը ճանաչում է այն հավատը, որի հիմքում մարդասիրությունն է, քանի որ հավատը, որը չի արտահայտվում մարդասիրությամբ, ոչ միայն ապտուղ է և անօգուտ, այլև անմաքուր է Տիրոջ առաջ: Քրիստոնեական կրոնը չի ճանաչում այլ օրենք, քան մարդասիրության օրենքը, «բայց դուք լավ կանեք, եթե իսկապես կատարեք Սուրբ Գրքի արքայական օրենքը, որ ասում է. «Սիրիր քո ընկերոջը, ինչպես ինքդ քեզ» (Հակոբ. 2:8)»: Աստծո հանդեպ սիրո միջոցով անձն իրեն քրիստոնյա է ճանաչում, բայց ի չիք է դառնում այդ սերը, եթե բացակայում է սերը մերձավորի հանդեպ: «Այն մարդը, որ ասում է՝ «Ես սիրում եմ Աստծուն», բայց ատում է իր եղբորը, որին տեսնում է, ինչպե՞ս կարող է սիրել Աստծուն, որին չի տեսնում» (Ա Հովհ. 4:20): Եթե անձն իրեն ճշմարիտ քրիստոնյա է համարում, երկրպագում ու պաշտում է Աստծուն, որ հանուն մարդկության փրկության մարդացավ և Իր կյանքը զոհեց, ապա նրա համար չպետք է անծանոթ լինի մարդասիրության մեծագույն օրենքը, որ պատգամեց Տերը. «Իմ պատվերն այս է, որ սիրեք միմյանց, ինչպես ես սիրեցի ձեզ: Մեծագույն սերն այն սերն է, որով մարդ ինքն իրեն զոհում է իր բարեկամների համար» (Հովհ. 15:12-13):

Առաջին դարից առ այսօր արքայական օրենքը կյանքի կոչելու արդյունքում են եկեղեցական համայնքներում կյանքի կոչվել սոցիալական ծրագրերը: Հուլիսի 15-ին Զորավոր Ս. Աստվածածին եկեղեցում հոգևոր հովիվ Տեր Գրիգոր քահանա Գրիգորյանը, Զորավոր Ս. Աստվածածին եկեղեցու և «Արև-երեխաներ» ՀԿ-ի սոցիալական ծրագրերի շրջանակում, Պետրոսյան Տաթևին (30 տ.) փոխանցեց դրամական աջակցություն (50 000 դրամ), որ տրամադրել էր համայնքից Դավիթ Սիրադեղյանը՝ դստեր ծննդյան առթիվ: Տաթևն իր ընտանիքի հետ բնակվում է Նոր Նորքի 2-րդ զանգած, Մոլդովական 50/1 բն. 16 հասցեում: Ընտանիքի երկու զավակներից ավագը՝ Դավիթը (6 տ.), Դաունի համախտանիշ ունի: Արև Դավիթը մի շարք նախասիրություններ ունի, սիրում է երաժշտություն լսել, լողալ, ֆուտբոլ խաղալ: Տաթևն իր երախտագիտությունը հայտնեց Տեր Գրիգորին և աջակից անձին:

Կարինե Սուգիկյան