Ամերիկայի Միացեալ Նահանգներու Արեւմտեան Թեմէն քրիստոնէական ջերմ սիրով կ՛ողջունենք Դաունի համախտանիշի միջազգային օրուան առթիւ եզակի սոյն հանդիսութիւնը ձօնուած Արեւ Երեխաներ կեդրոնին եւ անոր նուիրական ու ջերմ յարկին ներքոյ խնամքի արժանացած մեր հրաշք զաւակներուն։

Խոր գոհունակութեամբ կ՛ուզենք հաստատել, որ Տիրոջ օգնականութեամբ եւ Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի հովանաւորութեամբ եւ Արարատեան Թեմի Առաջնորդական Փոխանորդ՝ Բարձրաշնորհ Տէր Նաւասարդ Արք. Կճոյեանի անմիջական աջակցութեամբ ու առաջնորդութեամբ եւ Արժանապատիւ Տէր Գրիգոր Քահանայ Գրիգորեանի ղեկավարութեամբ Արեւ Երեխաներ կեդրոնը Աւետարանի ծառայական առաքելութեան յանձնարարութեանց հետքերով կը շարունակէ լայն արձագանգ գտնել մեր հաւաքական կեանքին մէջ: Կեդրոնը շնորհիւ հաւատաւոր հայորդիներու անսակարկ նուիրաբերումին ու յանձնառութեան հաստատակամ կը շարունակէ քրիստոնէական եւ մարդասիրական իր առաքելութիւնը ի խնդիր մեր զաւակներու բարօր ու արժանավայել կեանքին։

Այսօր մեր բոլորի մտածման սլաքը կ՛ուղղենք դէպի մեր ժողովուրդի կեանքին մաս կազմող ու յատուկ խնամքի կարօտ հայորդիներուն, որոնք կ՛արժանան Արեւ Երեխաներ կեդրոնի բացառիկ խնամքին ու բոլորիս անվերապահ զօրակցութեան: Մեր կեանքը դիմագրաւող տնտեսական, ընկերային, առողջապահական եւ այլ պատճառներու ու ազդակներու իբրեւ հետեւանք, Արեւ Երեխաներ կեդրոնի առաքելութիւնը փրկարար ու եզակի դեր կը խաղայ՝ նպատակ ունենալով նպաստել Դաունի համախտանիշ ունեցող երեխաներուն կեանքի որակի բարելաւմանը։ Ուրախ ենք վկայելու, թէ Դաունի համախտանիշը թէեւ մեծ ցաւ կը պատճառէ ծնողներուն ու անմիջական հարազատներուն, սակայն շնորհիւ Արժանապատիւ Տէր Գրիգոր Քահանայ Գրիգորեանի ջանքերուն եւ բոլորի հաւաքական նուիրումին,  այդ ցաւը չափով մը վերածուած է  երջանկութեան եւ օրհնութեան:

Կ՛ապրինք ժամանակաշրջանի մը մէջ, ուր փոխուած է ընկերութեան մտածելակերպը ու մօտեցումը յատուկ խնամքի կարօտ անձերու նկատմամբ: Միացեալ ազգերու կազմակերպութենէն սկսեալ կրօններ, պետութիւններ ու կազմակերպութիւններ յատուկ մասնագիտական կեդրոններ հիմնած են, հիմնադրամներ հաստատած ու զանազան ծրագիրներ մշակած, ինչպէս նաեւ յատուկ միջոցներու դիմած են գործնապէս դիւրացնելու համար անոնց կենցաղակերպը:  Ի ծնէ ֆիզիքական կամ հոգե-իմացական թերութիւններ ունեցող անձերու ներկայութիւնը ընկերութեան կեանքէն ներս նոր երեւոյթ չէ: Ֆիզիքական, մտային կամ հոգեկան դժուարութիւններով աշխարհ եկած անձեր երբեմն մեծ ղեկավարներ դարձած են եւ զանազան մարզերէ ներս եզակի իրագործումներ կատարած: Բարեբախտաբար, ներկայ ընկերութիւնը զանոնք իր անբաժան մասը կը նկատէ` համահաւասար պարտաւորութիւններով ու իրաւունքներով: Երբ հպանցիկ ակնարկ մը նետէք Աստուածաշունչի էջերուն վրայ, յստակօրէն կը պարզուի քրիստոնէական կրօնի ուսուցումը ընկերութեան կեանքէն ներս ֆիզիքական կամ մտային թերութիւններէ տառապող անձերու մասին:

Համաձայն Աստուածաշունչ մատեանին,  ֆիզիքական թերութիւնը երկրաւոր կեանքին առնչուած երեւոյթ մըն է, եւ նման  կացութեան ենթարկուած անձերուն Աստուած, որպէս Երկնաւոր Հայր, յատուկ գուրգուրանքով կը մօտենայ: Մարդու ունեցած թերութիւնները կը նկատուին առիթ ու մարտահրաւէր` մարդուն հաւատքն ու յոյսը Աստուծոյ նկատմամբ աւելի զօրացնելու եւ եղբայրսիրութիւնը առաւել ամրագրելու: Քրիստոսի փրկագործական առաքելութեան մաս կը կազմէր մարդու ունեցած ֆիզիքական թէ այլ թերութիւններուն բժշկութիւնը: Արդարեւ, բազմաթիւ են այն դրուագները, ուր հաւատքի մղումով Քրիստոսին մօտեցող անդամալոյծներ, կոյրեր, հաշմանդամներ, կաղեր, խուլեր եւ համրեր բժշկութիւն ստացան: Դարերու ընթացքին նոյն  մօտեցումը ունեցան նախ Քրիստոսի առաքեալները եւ ապա Եկեղեցին: Հետեւաբար, ֆիզիքական իմացական թէ հոգեկան թերութիւններ ունեցող անձերուն օգնելը, քրիստոնէական հաւատքին էական ուսուցումներէն մէկն է: Այս գիտակցութեամբ դարեր շարունակ գրած ու պատգամած են մեր եկեղեցւոյ հայրերը:

Ինչպէս որեւէ ազգի կամ ընկերութեան պարագային, բնականաբար հայ կեանքին մէջ եւս եղած են ու կան յատուկ խնամքի կարօտ անձեր, ինչպէս է պարագան Արեւ Երեխաներ կեդրոնի Դաունի համախտանիշ ունեցող երեխաներուն, ուր աշխատանք կը տարու ու անհրաժեշտ միջոցներ կը ստեղծուին, որպէսզի անոնք մեր հաւաքական կեանքին մէջ մնայուն ու գործօն ներկայութիւն դառնան: Հարկ է որ մեր աղօթքներով ու վերաբերումով վստահութիւն ներշնչենք անոնց, թէ իրենք մեր կեանքի լուսանցքին չեն պատկանիր, այլ` մայր էջին, եւ ամբողջական կերպով մասնակից են մեր համայնական կեանքին ու կը վայելէ մեր զօրակցութիւնը: Հետեւաբար, մեր գերագոյն ճիգը ի գործ դնենք մասնագիտական խնամքի կամ բուժման կարելիութիւններ ստեղծելու Դաունի համախտանիշ ունեցող մեր երեխաներուն համար, որոնք կը կարօտին մնայուն կամ ժամանակաւոր խնամքի: Սա նուիրական պարտաւորութիւն է իւրաքանչիւրիս համար:

Սիրելի հարազատներ,

Հայ Եկեղեցին իր հիմնադրութեան առաջին օրերէն իր առաքելութեան առանցքը դարձուց Աւետարանի քարոզութիւնը եւ հովուական ու մարդասիրական ծառայութիւնը։ 4-րդ դարու մեր հայրապետներէն Ներսէս Մեծը մեր Եկեղեցւոյ կեանքին մէջ կը մնայ խորհրդանիշ` կարիքաւորներու նկատմամբ իր նախանձախնդրութեամբ ու հոգածութեամբ: Այսօր եւս, Մայր Աթոռ Սուրբ Էջմիածինը իր աշխարհացրիւ Թեմերով,  իր նուիրեալ ու անձնուրաց մշակներուն ճամբով եւ ընկերային ու մարդասիրական ծրագիրներու մշակումով, որպէս լոյսի, յոյսի, յաղթութեան ու յարութեան փարոս մուտք կը գործէ մեր համայնքներէն ներս եւ իր շրջապատին ու պայմաններուն համապատասխան կերպով օգտակար կը հանդիսանայ խնամքի կարօտ մեր հայորդիներուն:

Հայ Եկեղեցւոյ ընկերաբժշկական ծառայութեանց շրջագիծէն ներս, այստեղ կ՛ուզենք բարձր գնահատել Արեւ Երեխաներ Կեդրոնի հիմնադիր ղեկավարի՝  Արժանապատիւ Տէր Գրիգոր Քահանայ Գրիգորեանի բոլոր ճիգերը, որու  անձնական կեանքի փորձառութեան, հոգեւորական կոչումին, քրիստոնէական անխախտ հաւատքին ու յանձնառւթեան շնորհիւ շատեր ջերմապէս ընդունեցին անոր առաքելութիւնը եւ նեցուկ կանգնեցան անոր ծրագիրներուն։ Պատիւ Տէր Հօր եւ Արեւ Երեխաներ կեդրոնի  ամբողջ անձնակազմին ու բժիշկներուն, որոնք Աւետարանի պատգամներն ու ուսուցումները կեանքի ու ծառայութեան վերածած՝    գոհունակութիւն եւ մխիթարութիւն կը պատճառեն ծնողներուն եւ ապահով միջավայր՝ մեր մանուկներուն: Վստահ ենք, որ վերանորոգ հաւատքով ու նուիրումով Կեդրոնը պիտի շարունակէ իրեն վստահուած ծառայութիւնը շարունակել նոյն հաւատքով, նուիրումով ու զոհաբերութեամբ, իսկ Ամերիկայի Միացեալ Նահանգներու Արեւմտեան Թեմը պիտի շարունակէ նպաստել անոր ծրագիրներու յաջողութեան:

Սիրելի հարազատ հայորդիք,

Մեր աղօթքներուն, մտածումներուն ու աշխատանքներուն մէջ յիշենք  Արեւ Երեխաներ կեդրոնը եւ առաւել խորացնենք անոր նկատմամբ մեր սէրն ու գուրգուրանքը, հոգածութիւնն ու նախանձախնդրութիւնը` գործնապէս ցոյց տալով, թէ անոր յարկէն ներս մասնաւոր հոգատարութեան արժանացող փոքրերը մեր ազգի կեանքին անբաժան ու անբաժանելի մասը կը կազմեն: Բոլորս ալ հաւաքական պատասխանատուութիւն մը ունինք մեր Հայրենիքին՝ Հայաստանին ու հայրենի մեր ժողովուրդին եւ ի մասնաւորի ֆիզիքական, մտային ու հոգեկան հիւանդութեամբ տառապող հայորդիներուն նկատմամբ, եւ հետեւաբար, իւրաքանչիւրս կոչուած է առաւելագոյն չափով օգտակար հանդիսանալ անոնց` մասնագիտական, ընկերային, հոգեւոր կամ տնտեսական իմաստով:

Վերջապէս, եկէք յիշենք Քրիստոսի պատմած առակը Բարի Սամարացիին մասին (Ղկ. 10.25-37): Անտարբեր չմնանք ֆիզիքական անկարողութեան դատապարտուած մեր ազգակիցներուն նկատմամբ, այլ դառնանք Բարի Սամարացի: Վստահ եղէք, որ մեր ազգը աւելի՛ կը հզօրանայ, մեր Եկեղեցին աւելի՛ կը պայծառանայ, մեր հայրենիքը աւելի՛ կը ծաղկի` երբ մեր ազգի կեանքէն ներս աւելնայ թիւը Բարի Սամարացիներուն:

Մեր խօսքը կը փակենք մէջբերելով հայ եկեղեցւոյ պարզ սակայն  խորիմաստ աղօթքէն սա հոգեթով բառերը․-

«Ո՜վ Տէր, մեր Աստուածը, քու ժողովուրդէդ փարատէ՛ ցաւերը եւ բժշկէ՛ հիւանդութիւնները. կատարեալ առողջութիւն շնորհէ բոլորին` քու ամենայաղթ Խաչիդ նշանովը, որով մարդոց տկարութիւնները քու վրադ առիր եւ դատապարտեցիր կեանքի ու փրկութեան թշնամին: Դո՛ւն ես մեր կեանքն ու փրկութիւնը, բարերա՜ր եւ բազումողորմ Աստուած. միայն դո՛ւն կրնաս մեր մեղքերը ներել եւ ցաւերն ու հիւանդութիւնները վանել մեզմէ, որովհետեւ քեզի ծանօթ են մեր կարիքները: Ո՜վ բարիքներու Պարգեւիչ, իւրաքանչիւրին կարիքներուն համաձայն` քու առատ ողորմութի՛ւնդ պարգեւէ արարածներուդ, որոնք միշտ կը փառաւորեն ու կ՛օրհնաբանեն քեզ ամենասո՜ւրբ Երրորդութիւն, այժմ եւ միշտ եւ յաւիտեանս յաւիտենից. Ամէն»:

Սիրոյ ջերմ ողջունիւ

Աղօթարար`

Յովնան Արք. Տէրտէրեան

Առաջնորդ՝

Ամերիկայի Միացեալ Նահանգներու Արեւմտեան Թեմի